Күндү ааҕааччыларбыт!

Үөһээ Бүлүүтээҕи оҕо библиотеката  “Дьиэ кэргэнинэн сахалыы ааҕыахха” бырайыага үүммүт 2026 сылга салгыы үлэлиирин биллэрэр. Бу бырайыакка элбэх дьиэ кэргэн кыттан кэллэ. Ол курдук 2024 сылга – 17 дьиэ кэргэн, 2025 сылга – 32 дьиэ кэргэн сылы быһа кыттан грамотанан, бирииһинэн наҕараадаламмыттара.

Бырайыак сыала-соруга: оскуола саастаах оҕолору сахалыы ааҕарга угуйуу, дьиэ кэргэни түмүү, сомоҕолооһун, ийэ тылы ытыктыырга, киэн туттарга иитии.

 Бу күрэх  сылы быһа ыытыллар. Хас ый аайы саха суруйааччытын биир  айымньыта ааҕыллар уонна ыйытыктарга эппиэттэнэр. Ыйытыктар айымньы ис хоһоонунан эрэ буолбакка, бу айымньыга баар тылларга эмиэ буолуон сөп. Холобура, тыл синонимыгар, антонимыгар, омонимыгар, сомоҕо домоххо, архаизмнарга, тыл суолтатын быһаарыыга, тылбааска уо д.а. Күрэх сорудахтара уонна ыйдааҕы түмүктэр  сыл устата Үөһээ Бүлүүтээҕи оҕо библиотека сайтыгар тиһигин быспакка тахсыаҕа. Күрэх ахсынньы ыйга түмүктэнэр.  Оҕо библиотекатын сайта: db.vvlibr.ru

Күндү ааҕааччыларбыт! Саха омук былыр-былыргаттан оҕолоон-биэбэйдээн, чочуйан-тупсаран кэлбит барҕа баайа Ийэ тыла буолар. Онон ийэ тылбытынан  ааҕан “Дьиэ кэргэнинэн сахалыы ааҕыахха” күрэххэ кыттаргытыгар ыҥырабыт.

Ааҕар киһи- билиилээх,

Билиилээх киһи- сайдыылаах,

Сайдыылаах киһи -ситиһиилээх!

                                    Үөһээ Бүлүүтээҕи оҕо библиотеката