Олоҥхо – саха норуотун айымньытын муҥутуур чыпчаала, духуобунай пааматынньыга буолар. Бары билэрбит курдук биһиги улууспут Олоҥхо ыһыаҕын ыытаары олорор. Быйылгы Олоҥхо ыһыаҕа Саха Өрөспүүбүлүкэтин 100 сыллаах өрөгөйдөөх үбүлүөйүгэр ананар.
Олоҥхо ыһыаҕын логотибын автородарынан буолаллар биир дойдулаахпыт, Нам нэһилиэгиттэн төрүттээх Былков Геннадий-Ойуус кэргэнинээн Анна Васильевналыын.
Олоҥхо ыһыаҕын логотибын хомуйан көрүҥ!
“Улуу Хотун Бүлүү”
Бүлүү эбэ уобараһа “Улуу Хотун Бүлүү” – саха дьонун айах тутан араҥаччылаан кэлбит, билигин да ууммутун уталыппатах Саха сирин уһаты-туора тымыр тардан уста сытар “эбэлэр” түмүллүбүт уобарастара, сирдээҕи олоҕу бэлэхтээччи күн Ийэ сырдык уобараһа, ыал холумтанын сыдьаайар сылааһа уонна олоҕу түстүүр күүстээх Таптал туоһута.
Саха дьахтарын симэҕэ-харысхала – “илин кэбиһэр” Россия норуотун сатабыла (ускуустубата) уонна өбүгэ кэс тыыннаах баайа буолар.
Хотун Бүлүү Эбэ барахсан алгыһын ылаат кини сылаас ытыһыттан ийэ тыл илбистээх иччитэ Ытык Чыыбыстаан көтөн күлүбүрэтэн тахсан айыы дьонун Олоҥхо ыһыаҕар ыҥырар уонна Аар айыыларга кинилэр көрдөһүүлэрин -ааттаһыыларын, сүгүрүйүүлэрин тиэрдэр.
Айыылар алҕаабыт түһүлгэлэригэр, дьон аймах бүтүн түмсүүтүн кэрэһэлиир урааҥхай саха төрүт үҥкүүтэ – оһуохай тэнийдэр тэнийэр.
