Оскуолаҕа, учууталга анаммыт хоһооннор
Дорообо оскуолабыт!
Семен Руфов
Итиитик саныы сылдьабыт,
Иитиллэр оскуолабыт!
Эн ыччаттарыҥ кэлэммит
Эҕэрдэ этэн эрэбит.
Сайыны быһа утуктуу
Чуҥкуйбуккун умнубуккун –
Эн бүгүн уруккугунуу
Эмиэ көрүнэн туолбуккун!
“Үтүө чаас!” диэн эҕэрдэлээн,
Ааныҥ үрдүттэн уруйдуу,
Кыраасканнан күлүмүрдээн
Кылбайан, тупсан тоһуйдуҥ.
Күлсүү-салсыы, көрдөөх күүгэн
Көрүдүөр иһин толорор,
Эйиигин ахтан эрдэлээн
Кэллибит бары оҕолор.
Сылы быһа билиигиттэн
Сылайбакка кэпсээн биэриэҥ,
Ийэ дойдуга эрдэттэн
Итии тапталбытын иитиэҥ.
“Үөрэниэххэ” диэн эһэбит
Улуу Ленин кэриэһин
Экчи толоруохпут диэммит
Эрэннэрэбит эйиигин!
Оскуола
Петр Одорусов
Үөрэх-билии ыларга,
Үөрэ-көтө сылдьарга.
Үчүгэйгэ үөрэтэр,
Үгүстэри иҥэрэр
Оҕо-аймах биһигэ –
Оскуолабыт биһиэнэ.
Үтүө-мааны майгыга,
Үрдүк ыраас суобаска,
Үчүгэйгэ үөрэтэр,
Үгүстэри иҥэрэр
Оҕо-аймах биһигэ –
Оскуолабыт биһиэнэ.
Киһи буолан үүнэргэ,
Кэскиллээҕи өйдүүргэ,
Үчүгэйгэ үөрэтэр,
Үгүстэри иҥэрэр
Оҕо-аймах биһигэ –
Оскуолабыт биһиэнэ.
Дьонноох дьоннор буоларга,
Дьону, Сири таптыырга,
Үчүгэйгэ үөрэтэр,
Үгүстэри иҥэрэр
Оҕо-аймах биһигэ –
Оскуолабыт биһиэнэ.
