“Ааҕар киһи – билиилээх,
Билиилээх киһи – сайдыылаах,
Сайдыылаах киһи – ситиһиилээхх!”
Үөһээ Бүлүүтээҕи оҕо библиотеката ааспыт сылларга төрөөбүт улууспут үбүлүөйдээх сылыгар, Олоҥхо тула уонна саха суруйааччыларын олохторун, айар үлэлэрин туһунан куйаар ситимин нөҥүө викториналары ыытан, ааҕааччы киэҥ араҥата кыттыыны ылан, дьон сэҥээриитин ылбыта. Ол үтүө саҕалааһыны утумун быспакка “Сахалыы ааҕыахха” диэн саха суруйааччыларын айымньыларынан саҥа викторина тохсунньу ыйтан саҕаланарын биллэрэбит. Бу викторинаҕа сааһыттан, олорор сириттэн тутулуга суох ким баҕарар кыттыан сеп. Биирдиилээн да кыттыахха сөп, дьиэ кэргэнинэн кыттыы биһирэнэр, орто уонна үрдүкү сүһүөх кылаас оҕолоро кытталлара хайҕабыллаах.
Тохсунньу ый биир бэлиэ күнүнэн биир дойдулаахпыт учуутал, редактор, суруйааччы Седалищев Никифор Кирикович- Дьүөгэ Ааныстыырап 110 сыла буолар. Онон бастакы викторинабыт боппуруостара Дьүөгэ Ааныстыырап “Ньургуһун уонна Лоокуут” диэн норуот үһүйээнин матыыбынан суруллубут бэртээхэй сэһэниттэн буолаллар. Викторина сыл устата Үөһээ Бүлүү оҕо библиотекатын сайтыгар тиһигин быспакка ый аайы тахсыаҕа. Оҕо библиотекатын сайта: https://db.vvlibr.ru/
Викторинаны дьүүллүүр сүбэ ахсынньы ый 28 күнүгэр түмүктүүр. Бары кыттааччыларга туоһу сурук, миэстэлэспиттэргэ, анал ааттаахтарга хайҕал лиис уонна бириис туттарыллар.
Күндү ааҕааччыларбыт! Саха омук былыр-былыргаттан оҕолоон-биэбэйдээн, чочуйан-тупсаран кэлбит барҕа баайа ийэ тыла буолар. Онон ийэ тылбытынан ааҕан “Сахалыы ааҕыахха ”диэн саҥа викторинаҕа кыттыыны ыларгытыгар ыҥырабыт.
Үөһээ Бүлүүтээҕи оҕо библиотеката
I. Никифор Кирикович Седалищев-Дьүөгэ Ааныстыырап «Ньургуһун уонна Лоокут»
II. Анемподист Иванович Софронов-Алампа “Куоратчыт”
III. Анна Денисовна Неустроева “Тиргэһиттэр”
IV. Василий Семенович Яковлев – Далан “Кучуна”
V. Николай Гаврильевич Золотарев – Якутский “Сир кыыһа”
VI. Петр Николаевич Тобуроков “Дьикти кыра кутуйах”
VII. Платон Алексеевич Ойунскай “Оҕо куйуурдуу турара”
VIII. Николай Алексеевич Габышев “Ахтылҕан”
IX. Василий Николаевич Титов “Быһыы килиэп уонна амарах сүрэх”
X. Степан Егорович Дадаскинов “Кыталыктар үҥкүүлэрэ”
XI. Дмитрий Кононович Сивцев-Суорун Омоллоон “Хараҥаҕа тыкпыт сырдык”
